Ўзбекистон Олий Мажлиси Қонунчилик палатаси учун 150 та Apple iMac 21,5 Retina 4K моноблоклари сотиб олинди. Бу ҳақда Вазирлар Маҳкамасининг 19 декабрдаги қарорида қайд этиб ўтилган. «Газета.уз» манбалари берган ахборотга кўра, компьютерлар аллақачон етказиб берилган — улар 150 депутатнинг ҳар бирининг хизмат хонасига ўрнатиб чиқилади.
Қонунчилик палатаси учун сотиб олинган ускуналар орасида 5 та Apple iMac 27 Retina 5K моноблоки (афтидан, палата спикери ва унинг ўринбосарлари учун), 20 та HP All-in-One 22-c-00115t моноблоки, 20 та «тўрттаси бирда» (принтер, сканер, нусха кўчириш, факс) қурилмаси ва 50 та принтер ҳам бор.
Ҳукумат қарорида қайд этилишича, бу парламент қуйи палатасининг ахборот-коммуникация инфратузилмасини янгилаш ва «Электрон парламент» тизимини ривожлантириш доирасида қонун ижодкорлиги жараёнига АКТни жорий этиш мақсадида қилинмоқда.
Ушбу ускуналар учун молиялаштириш манбаси сифатида Вазирлар Маҳкамасининг захира жамғармаси кўрсатилган (@davletovuz) айтмоқчи: «Балки шундан кейин депутатлар танқидни камайтиришар?»). Бундан ташқари, АКТни ривожлантириш жамғармаси ҳисобидан сервер ускунаси ва иккита маълумотлар омбори, Windows Server 2016 операцион тизими ва Wi-Fi қурилмалар сотиб олинади.
Сотиб олинаётган техника ва дастурий таъминотларга бюджетдан қанча маблағ сарфланиши қарорда айтилмаган. Лекин буни ҳисоблаш унчалик қийин эмас. «Журнализд» ҳисоблаган: масалан, Apple’нинг расмий сайтида депутатлар учун сотиб олинган моноблокларнинг нархи, комплектациясига қараб, 1550 доллардан 1785 долларгача; шуни 150 га кўпайтирса, 232 мингдан 267 минг долларгача пул бўлади (аслида яна 2 га кўпайтириб юбориш керакми, ҳар ҳолда, пул ўтказиш йўли билан, бирор «танланган» воситачи етказиб берган чиқар).
@xushnudbek савол беряпти: «Қизиқ, депутатлар учун мўлжалланган iMac’ларга VPN ҳам ўрнатиб беришармикин?». VPN’ни билмадик-ку, лекин @kurbanoffnet’нинг ёзганларидан хулоса чиқарадиган бўлсак, Windows операцион тизими бўлади.