Бошқа мавзуларЖорий йилнинг августида истеъмол бозоридаги ўртача нархлар даражасининг ой давомидаги ўсиш суръати 2,9 фоизни ташкил этди. Давлат статистика қўмитаси хабарига кўра, январь-август ойларида товарлар ва хизматлар нархи 8,2 фоизга қимматлашди.
2018 йилнинг август ойига нисбатан ўртача нархлар 16,5 фоизга ошган. 2018 ва 2019 йилларнинг январь-август даврларидаги ойлик нархлар ўзгариши деярли ўхшаш: январдан майгача ўртача нархлар даражаси кўтарилган, кейинги икки ой давомида эса нархлар арзонлашиб, август ойида истеъмол нархлари индекси 100 фоизлик кўрсаткичдан юқорини ташкил этган.
Ўтган ойга нисбатан сўнгги 1 йил 8 ой давомидаги истеъмол нархлари индекси ўзгариши динамикаси таҳлилларига кўра, товарлар ва хизматлар истеъмол нархлари индексининг ўсиш суръати жорий йилнинг август ойида максимал даражани ташкил этди (2,9 фоиз). Шунингдек, нисбатан юқори кўрсаткичлар 2018 йилнинг январь (2,7 фоиз), ноябрь (2,3) ҳамда декабрь (2,1) ойларида ҳам қайд этилган.
Таққосланаётган даврлардаги ўртача нархлар даражасининг энг юқори кўрсаткичлари 2018 йилнинг май ойида (106,6 фоиз), 2019 йилнинг август ойида (108,2 фоиз) қайд этилган.
Умумий ҳисобда йиллик истеъмол нархлари индекси кўрсаткичларининг минимал даражаси 2019 йилнинг январь ойида (113,0 фоиз), максимал натижа 2018 йилнинг январь ойида (120,1 фоиз) қайд этилган.
Шу билан бирга, ушбу кўрсаткич динамикасини ўрганиш натижаси шуни кўрсатмоқдаки, 2018 йил давомидаги узоқ муддатли пасайиш тенденцияси ҳамда 2019 йилнинг январь-июль ойларида нархлар нисбатан барқарор сақланиб, йиллик истеъмол нархлари индекси кўтарилиш томон ҳаракатланди (2019 йилнинг август ойидаги кўрсаткич 16,5 фоиз, 2019 йилнинг июль ойида 13,5 фоиз).
Йирик гуруҳлар бўйича нархлар ўзгаришига кўра, 2019 йилнинг август ойи натижаларига асосан ой давомида товарлар нархлари ўртача 2,2 фоиз, жумладан, озиқ-овқат маҳсулотлари 2,3 фоиз, ноозиқ-овқат маҳсулотлари 2,1 фоизга кўтарилди. Хизматлар нархлари ой давомида 5,6 фоизга қимматлашди. Таққослаш учун: 2018 йилнинг августида озиқ-овқат маҳсулотлари нархлари ой давомида ўртача 0,3 фоиз, ноозиқ-овқат маҳсулотлари 0,3 фоиз, хизматлар эса 0,4 фоизга қимматлашган.
Умумий ҳисобда 2019 йилнинг январь-август ойлари давомида озиқ-овқат маҳсулотлари нархлари 6,9 фоиз, ноозиқ-овқат маҳсулотлари 7,8 фоиз, хизматлар 11,5 фоизга қимматлашган.
Йиллик кўринишда (2019 йил август ойи 2018 йилнинг август ойига нисбатан) озиқ-овқат маҳсулотлари нархлари 19,7 фоиз, ноозиқ-овқат маҳсулотлари 11,5 фоиз, хизматлар 18,6 фоизга кўтарилди.
