Бошқа мавзуларАфғонистонда ҳокимият тепасига келган “Толибон” ҳаракати мамлакатнинг давлат тузумларига аввалги Афғонистоннинг уч рангли байроғи ўрнига ҳаракатнинг оқ байроғидан фойдаланишни буюрди. Бу ҳақда Толибон муваққат вазирлар маҳкамасидаги ахборот ва маданият вазири ўринбосари Аҳмадуллоҳ Восиқ маълум қилди.
Каbul News афғон телеканали Толибон байроқни давлат идоралари учун ўзгартиришга буйруқ берганини тасдиқлади. Телеканалнинг билдиришича, буйруқда барча давлат идораларида собиқ Афғонистон байроғини, Афғонистон Ислом Амирлиги байроғи билан алмаштириш зарурлиги айтилган, байроқ «Шаҳодат» калималари ёзилган оқ мато бўлиши кўзда тутилган.
АҚШ ўз қўшинларини Афғонистондан олиб чиқиш қарорини эълон қилганидан сўнг, Толибон Афғонистонда назоратни қўлга киритиш учун кенг кўламли операция бошлади. 2021-йил 15-август куни Толибон жангсиз Кобулга кириб келди ва Афғонистоннинг ўша пайтдаги президенти Ашраф Ғани республикани тарк этди. 6-сентабрь куни Толибон Афғонистоннинг бутун ҳудудини ўз назоратига олганини эълон қилди, 7-сентабрда эса қонунийлиги тан олинмаган муваққат ҳукумат таркибини эълон қилди.
