Ўзбекистон водопровод суви хавфли бўлган 187 та мамлакат қаторидан жой олди

Globehunters турагентлиги АҚШнинг Касалликлар назорати ва профилактикаси маркази маълумотларига таяниб, водопровод суви хавфсиз бўлмаган мамлакатлар рўйхатини тузди. Бу ҳақда Daily Mailга асосланиб “Дарё” нашри ёзмоқда.

Рўйхатга 187 та мамлакат, шу жумладан, Ўзбекистон, Россия ва деярли барча собиқ иттифоқ республикалари (Эстониядан ташқари) кирди.

Таъкидланишича, бу рўйхатга кирган мамлакатлар ҳудудида водопровод суви ифлос дегани эмас, у шунчаки ичиш учун тўғри келмаслиги мумкин, холос.

АҚШ (Гуам оролидан ташқари), Канада, Австралия, Чили, Япония, Жанубий Корея, Саудия Арабистони, Буюк Британия, Норвегия ҳамда Евроиттифоқнинг кўпчилик мамлакатларидаги водопровод суви эса хавфсиз деб топилди.