Бошқа мавзуларБМТ Инсон ҳуқуқлари бўйича Олий комиссари Россия қўшинлари Украинага бостириб кирганидан бери 2072 нафар тинч аҳоли ҳалок бўлганини маълум қилди. Улардан 169 нафари болалардир. Жароҳатланган 2818 кишининг 272 нафари болалардир.
Ҳалок бўлганларнинг аксарияти Донбассда – 732 киши. Уруш бошланганидан бери Украина назоратидаги ҳудудларда 653 киши, россияпараст айирмачилар назорати остидаги ҳудудларда эса 79 киши ҳалок бўлган.
БМТ ҳарбий амалиётлар давом этаётган ҳудудлардан маълумот олиш кечикаётганини ҳисобга олганда, қурбонлар сони бундан ҳам кўп бўлиши мумкин эканини маълум қилди.
Украина Ички ишлар вазирлиги 15-апрелда камида 2700 тинч аҳоли ўлдирилганини маълум қилди. Вазир Арсен Аваков бу жиноий иш ошкор бўлганлари холос, деди.
Россия ташқи ишлар вазири Сергей Лавров Россия армияси Украинада “ҳарбий операция”нинг навбатдаги босқичини бошлаганини айтди. Бу ҳақда у 19-апрель куни India Today телеканалига берган интервьюсида айтиб ўтди.
Лавровнинг сўзларига кўра, Россия қўшинлари Донецк ва Луганск вилоятлари ёки Украина шарқидаги Донбасс минтақасини тўлиқ назорат остига олгунча Россия “операцияси” давом этади.
Россиянинг бош дипломати Лавров яқинда берган интервьюсида Москванинг Украинада ядро қуролини қўллаш режаси йўқлигини айтиб, Россия қўшинларининг асосий нишони тинч аҳоли эмас, ҳарбий объектлар эканлигини қўшимча қилди. Аммо Украина расмийларининг айтишича, Россия кучлари юзлаб тинч аҳолини ўлдирган.
