Тошкент вилоятида “Ҳаракат хавфсизлиги ойлиги” тадбирлари доирасида 41 қоидабузарлик аниқланган.
Жумладан, 13 ҳолатда автомобилга ўрнатилган газ баллонининг муддати ўтган, 7 ҳолатда ноқонуний газ баллони ўрнатилган, 21 ҳайдовчи эса машинасига ўрнатилган газ мосламасининг ҳужжат йўқ бўлган.
Рейдлар давомида Юқори Чирчиқ туманидаги “Pavlon Petrol” МЧЖ газ қуйиш шохобчасида турли машиналарга (шу ерда машиналарнинг рақамлари ёзилган) газда ишлаш учун қайта жиҳозлангани ҳақидаги ҳужжатларсиз газ ёқилғиси қуйиб берилгани аниқланган.
Тошкент вилояти ИИББ шу хабарни бераркан, сурат илова қилган ва расмдаги машина рақамини коллаж билан ёпиб ташлаган (суратда). Тўғри қилишган, дейишга шошилманг, чунки хабар матнида машина русумию давлат рақамлари миридан сиригача ошкор этилган. Қани мантиқ?
Эсингизда бўлса, ЙПХ ходимини съёмка қилиб, унинг рухсатисиз интернетга жойлашни тақиқлашмоқчи эди. ЙПХ ходимлари ҳам суратга олган одамини интернетга тарқатишдан олдин ўша инсондан рухсат олиши шарт.
Нафақат расми, балки у ҳақдаги шахсий маълумотлар: исми, машина рақами, манзили, телефон рақами ва ўзи ошкор қилишни истамаган ҳар қандай маълумот сир сақланиши шарт. Бу унинг шахсий дахлсизлик ҳуқуқи!