Бошқа мавзуларТуркманистон президенти Сердар Бердимуҳамедов собиқ вазирлар маҳкамасини ишдан бўшатиш ҳақидаги фармонини имзолади.
Туркманистоннинг янги раҳбари бу ҳақда президент инаугурацияси ҳамда фахрий қоровул ва ҳарбий қисмлар парадидан сўнг маълум қилди.
“Нейтральный Туркменистан” газетаси хабарига кўра, президент Сердар Бердимуҳамедов параддан сўнг расмий вазифаларини бажариш учун Ўғузхон саройига жўнаб кетган.
“Туркманистон Конституциясига биноан Давлат раҳбари ҳукумат аъзоларининг тўлиқ ваколатларини тугатиш тўғрисидаги фармонни имзолади, уларга Вазирлар Маҳкамасининг янги таркибини шакллантирилгунга қадар ўз вазифаларини бажаришда давом эттиришни буюрди”, — дейилади хабарда.
12-март куни Туркманистонда навбатдан ташқари президент сайлови бўлиб ўтди. Президентлик учун 9 нафар сиёсий номзод даъвогарлик қилди. Сайловда Бош вазир ўринбосари Сердар Бердимуҳаммедов 72,97 фоиз овоз тўплаб, ғалаба қозонди. Туркманистон Президенти етти йил муддатга сайланади ва қасамёд қилган пайтдан эътиборан ўз фаолиятини бошлайди.
