Бошқа мавзулар
Хитойнинг Shandong Airlines авиакомпанияси Американинг Boeing авиақурилиш корпорациясига 50та Boeing-737 самолётлари учун буюртма берди. BBC News хабарига кўра, cавдо қиймати 4,6 миллиард долларни ташкил этади. Бироқ, буюртма берилган лайнерларнинг сотиб олинишини Хитой ҳукумати маъқуллаши керак.
Агар ушбу савдони ҳақиқатан ҳам Хитой ҳукумати қўллаб-қувватласа, яъни савдо амалга ошишини таъминлайдиган бўлса, бу Boeing’нинг Хитой бозори учун курашда Airbus ва Comac Хитой давлат авиақурилиш корпорацияси билан рақобатида катта ютуқ бўлади.
Айниқса, 100-200 нафар йўловчига мўлжалланган ингичка фюзелажли самолётлар сегментидаги рақобат шиддатли бўлиши тахмин қилинмоқда. Таҳлилчиларнинг фикрича, яқин 20 йил ичида ушбу секторда савдолар ҳажми жаҳон бўйлаб 20 триллион долларни ташкил этиши мумкин.
Илгарироқ Хитой компаниялари Airbus’нинг умумий қиймати тахминан 20 миллиард долларга тенг бўлган 150та самолётини сотиб олиш бўйича музокаралар олиб боришган эди.
Бундан ташқари, Airbus ўзининг Хитой ҳудудидаги иккинчи заводини очишни ҳам режалаштирмоқда.
Хитой авиаташувлар бозори жаҳондаги энг истиқболли бозорлардан бири ҳисобланади. Хитой авиакомпаниялари маҳаллий парвозлар учун кўпроқ унча катта бўлмаган эконом-лайнерларни сотиб олишни йўлга қўйишмоқда.
Мулкдор хабар маркази
