Бошқа мавзуларАХМЕДОВ Раҳим Аҳмедович (1921.26.7, Тошкент) — рассом. Ўзбекистон халқ рассоми (1961). Ўзбекистон БА фахрий аъзоси (1997). Тошкент бадиий билим юрти (1937—41) ва Ленинград рассомлик, ҳайкалтарошлик ва меъморлик институтида (1947—53) таълим олган. 1953 йилдан Тошкент театр ва рассомлик санъати институтида ўқитувчи, 1976 йилдан профессор. Ўзбекистон Рассомлар уюшмаси бошқаруви раиси (1965—84, 1992—94).
Раҳим Аҳмедов асарлари чуқур психологик ифодалилиги билан ажралиб туради, уларда ички кечинмалар, ҳис-туйғулар моҳирона ифодаланган. Ижодини асосан портретлар чизиш билан бошлаган («Қаҳрамон она», 1949, «Чўпон», 1952, «Студент қиз портрети», 1954 ва б.). Рассом яратган портретлар («Она ўйлари», «Кекса колхозчи портрети», 1956; «Ўзбек қизи портрети», 1958; «Қашқадарёлик аёл», 1959; «Меҳнатда ҳам солдат», 1961; «Сурхондарслик аёл», 1962; «Муқимий», 1968; «Нигора», 1971; «У. Тансиқбоев», 1972; «Лола портрети», 1979; «Наби Рахимов», 1983; «Шуҳрат Аббосов», 1987 ва б.) ўзбек тасвирий санъатида портрет жанрининг ривожига катта ҳисса бўлиб қўшилди. Манзаралар («Баҳор», 1964, «Наҳор. Оқтош баҳори», 1971 ва бошқа), натюрмортлар («Натюрморт», 1954, «Натюрморт», 1965 ва бошқа) ҳам яратган. Турли шароитларда акс эттирилган аёллар образлари («Қўшиқ», 1964; «Январь. 1924 йил» ва б.) ҳам жозибалидир. Асарлари Ўзбекистон санъат музейи, Бадиий кўргазмалар дирекцияси, Шарқ халқлари санъати музейи ва бошқа музейларда сақланади.
Асарлари 1948 йилдан республика ва халқаро кўргазмаларда намойиш этилади. Ҳамза номидаги Ўзбекистон Давлат мукофоти лауреати (1967). «Буюк хизматлари учун» ордени билан мукофотлан- ган (1998).
Манба:ЎзМЭ
