Фарғона вилоятининг Учкўприк туманидан келаётган хабарларга қараганда «Ўрозмерган» маҳалласидаги қатор уй-жойлар йўл қурилиши муносабати бузилишга тушган. Бу тадбир қишнинг совуқ кунларида, аҳолини уй-жой билан таъминламасдан туриб амалга оширилаётгани айтилмоқда, дея ёзмоқда «Xabar.uz» нашри.
Аҳоли уйлари бузилишини аввалдан билган, бунга монелик қилишмаган ҳам. Сабаби маҳаллий ҳокимият уларга ер майдони берилишини, берилгандаям шу маҳалланинг ўзидан ажратилишига қаттиқ ишонтиришган экан. Бироқ кейинчалик маълум бўладики, уйи бузилган фуқароларга дашт ҳудудидан ер ажратилган.
«Бу ҳудудда на свет, на газ, на ҚВП бор! Мактаб, боғча ҳақида-ку гапирмасаям бўлади», — дейди «Xabar.uz»га мурожаат қилган маҳаллий фуқаролардан бири.
Совуқ кунлардаги бунақа «фаоллик»дан ёш болалар, қариялар, беморлар айниқса кўпроқ азият чекиши табиий.
Айни пайтда ҳамма уйлар бузилиб бўлинган, фақат оғир бемори бор хонадон қолган, холос.