Бошқа мавзуларЖорий йилнинг январидан августига қадар 221,1 минг хорижликка Россия фуқаролиги берилди. Бу ҳақда Россия Федерациясининг инсон ҳуқуқлари бўйича вакили Татьяна Москалькова маълум қилди.
Унинг айтишича, мурожаатларнинг аксари собиқ Совет Иттифоқи мамлакатларига тўғри келган: Украина, Ўзбекистон, Тожикистон, Қозоғистон, Озарбайжон, Арманистон ва Молдова.
Фуқаролик ва миграция масалалари бўйича омбудсманга келиб тушадиган шикоятлар сони эса камайган. Москалькова буни айрим мамлакатлар фуқаролари учун Россия фуқаролигини бериш осонлаштирилгани билан изоҳлади.
Россия ички ишлар вазирлиги маълумотига кўра, охирги беш йилда Россия фуқаролиги олган хорижликлар сони икки баравар ортиб, 2018 йилда 269 мингга етган. Ўтган йили энг кўп украиналиклар (83 минг киши), қозоғистонликлар (45 минг), тожикистонликлар (35 минг), арманистонликлар (27 минг) ва ўзбекистонликлар (21 минг) Россия паспортини олди.
