Британия бош вазири Японияга эмас, Украинага ташриф буюрадиган бўлди

Буюк Британия бош вазири Борис Жонсон Японияга ташрифини номаълум муддатга қолдирди. Бу ҳақда Kyodo нашри хабар берди.

Жонсоннинг ҳизмат сафари февраль ойининг ўрталарига мўлжалланган. Британия томони сафар қолдирилгани сабабини Украина атрофидаги вазиятнинг кескинлашгани билан изоҳлади.

Дастлабки маълумотларга кўра, Борис Жонсон Япония бош вазири Фумио Кисида билан учрашмоқчи эди. Учрашувда коронавирусга қарши биргаликда курашиш, саноатда углерод истеъмолини камайтириш, Хитой ва Украинадаги вазият муҳокама қилиниши керак эди.

29 январь куни The Guardian нашри Борис Жонсон февраль ойининг биринчи ҳафтасида Украинага ташриф буюриши ҳақида хабар берди. Нашрнинг ёзишича, Британия бош вазири Россия ва Украина ўртасидаги музокараларда воситачилик қилмоқчи.