Бугун, 10-март куни Қирғизистон-Тожикистон чегарасида қуролли тўқнашув юз берди. Бу ҳақда Қирғизистон давлат чегара хизмати хабар бермоқда.
Тахминан соат 10:50 ларда Боткен вилоятининг Терскей ҳудудидаги аниқланмаган чегара ҳудудида навбатчилик қилаётган тожик чегарачилари маршрутни ўзгартириб, қирғиз чегарачиларидан ҳудудни тарк этишни талаб қилишган.
Воқеа жойига Тожикистон чегарачиларидан қўшимча кучлар етиб келиб, янги чекка киришга ҳаракат қилишган. Қирғизистон чегарачилари бунга рухсат бермаган. Натижада отишма содир бўлган.
Ҳар икки томон чегара вакиллари телефон орқали гаплашиб, қўриқчиларни воқеа жойидан эвакуация қилишга, қўшимча куч ва қурол олиб келмасликка келишиб олган.
Отишмадан жабрланганлар қайд қилинмади. Ҳозирда икки томон вакиллари музокаралар олиб бормоқда. Боткен вилояти чегарачилари юқори шай ҳолатга келтирилди.
Чегара хизматининг таъкидлашича, Терскей ҳудуди давлат чегарасининг аниқланмаган ҳудудига тегишли бўлиб, Қирғизистон фуқаролари томонидан фойдаланилади.