АҚШ Тожикистон чегарачиларига 2,95 миллион долларлик техник ёрдам кўрсатди

АҚШнинг Душанбедаги элчихонаси тожик чегарачиларига радио, юк машинаси ва Jeep J8 автомобили учун эҳтиёт қисмларини совға қилди.

Рация ва автомобилларнинг умумий қиймати 1,1 миллион долларни ташкил қилади. Шунингдек Jeep J8 эҳтиёт қисмлари ва техник хизмат кўрсатиш устахонасини очишнинг қиймати 1,85 миллион долларни ташкил этади. АҚШ техник ёрдам Тожикистоннинг чегара ҳудудларини ҳимоя қилишда ёрдам беради, деб ҳисоблайди.

Аввалроқ, 2021-йилнинг ноябрида АҚШ тожик чегарачиларига 1,4 миллион доллар миқдорида 18 та Jeep J8 автомобилини ёрдам сифатида берган эди.

АҚШ 1992-йилдан бери Тожикистонга хавфсизлик учун 330 миллион доллар ёрдам берган. Бунга кадрлар тайёрлаш ва инфратузилма ҳам киради.