Бошқа мавзуларБурятияда ҳарбийларнинг рафиқалари республика раҳбари Алексей Циденовга видеомурожаат йўллаб, эрларини уйларига қайтаришни талаб қилишди. Мурожаатномани йўллаганлардан бири Вера Партилхаеванинг «Сибирь. Реалии» нашрига айтишича, январда «машғулотга» юборилган аскарлар ҳозир Украинада юрибди.
«24-февралдан бери улар махсус операцияга жалб қилинган. Улар чарчаган ва маънавий жиҳатдан ҳолдан тойиган. Барчаси енгил ёки ўрта контузия олган», дейишди аёллар.
Партилхаева ижтимоий тармоқдаги саҳифасига: «Ҳамма қўрқади, уларга оғзингизни ёпинг деган буйруқ берилган. Бу ноҳақ урушда ҳалок бўлган ҳар бир аскарнинг ўлими сизларнинг виждонингизга ҳавола! Фарзандларимиз ва эрларимизни ватанига қайтаринг!» – деб ёзди.
Унинг сўзларига кўра, мурожаатни Тацинск танк бригадасида хизмат қилаётган аскарларнинг рафиқалари йўллаган. Ушбу бригаданинг камида 30 аъзоси ҳалок бўлгани хабар қилинган.
«Сибирь.Реалии» хабарига кўра, июннинг ўрталарида бурятиялик 184 нафар аскарнинг жангларда ҳалок бўлгани тасдиқланди. Бу борада республика Россияда иккинчи ўринда туради. Россия Мудофаа вазирлиги статистик маълумотларга расман изоҳ бермаяпти. Аёлларнинг мурожаатига ҳукумат ҳозирча жавоб бергани йўқ.
