Жээнбеков ўз ваъдасида туриб, Атамбоевни Қирғизистон қаҳрамони унвони билан тақдирлади

Алмазбек Атамбоевга Қирғизистон Республикаси Қаҳрамони унвони берилди, деб ёзади KNews президент матбуот хизматига таяниб.

Сооронбай Жээнбековнинг фармонига кўра, халқ олдидаги хизматлари, Қирғизистон давлат мустақиллигини мустаҳкамлашга, халқ бирлигига, мамлакатдаги тинчлик ва тотувликка қўшган ҳиссаси, шунингдек, кўрсатган сиёсий иродаси ва жасорати учун Алмазбек Атамбоевга олий даражали «Қирғизистон Республикасининг Қаҳрамони» ордени «Оқ шунқор» махсус кўкрак белгиси билан бирга берилди.

Эслатиб ўтамиз, инаугурация куни Қирғизистоннинг янги президенти Сооронбай Жээнбеков ўзидан аввалги президент — Алмазбек Атамбоевни республика қаҳрамони унвони билан тақдирлашга ваъда берган ва бу унинг давлат раҳбари лавозимидаги биринчи фармони бўлишини айтган эди.