Бошқа мавзулар
Қирғизистон ва Ўзбекистон автобусларнинг учта – “Тошкент-Бишкек”, “Андижон-Ўш” ва “Фарғона-Ўш” йўналишлари бўйича мунтазам қатновини йўлга қўйиш бўйича келишиб олди.
Бу борадаги келишув ўтган ҳафта сўнгида Тошкентда бўлиб ўтган халқаро автомобил ташувлари масалаларига бағишланган ўзбек-қирғиз мажлисида эришилди.
Ўтган йилнинг декабрь ойи сўнгида Қирғизистон ҳукуматининг парламентдаги вакили Аширбек Темирбаев расмий Тошкент ва Бишкек Ўзбекистон шаҳарларидан Жалолобод ва Қизилқия шаҳарларига автобус қатновларини йўлга қўйишни тиклаш масаласини муҳокама қилгани борасида маълум қилган эди.
Аширбек Темирбаев шунингдек, баҳор ойларига яқин “Тошкент-Бишкек-Балиқчи” йўналиши бўйича темир йўл қатнови очилишини ҳам айтган эди.
«Келишувларга кўра, ҳафтада бир марта Ўзбекистон темир йўлларининг поездлари қатнайди», – деди Темирбаев.
Эслатиб ўтамиз, 2017 йилнинг 23 декабрь куни Air Manas компанияси «Бишкек–Тошкент» йўналиши бўйича самолёт қатновини йўлга қўйди, парвозлар ҳафтада икки марта амалга оширилади. Айнан ўша куни “Ўш-Тошкент” йўналиши бўйича ҳам парвозлар амалга оширилди.
