ЎзЛиДеп сиёсий кенгаши аъзоси фермерларни Экологик партияга аъзо қилмоқчи. Ҳар бир туманга «план» ҳам қўйилган
Ўзбекистон Фермер, деҳқон хўжаликлари ва томорқа ер эгалари Жиззах вилояти кенгаши раиси А.Эшматов номидан туманларга хат чиқарилиб, яқиндагина ташкил этилган Экологик партияга ҳар бир тумандан 50 кишини аъзо қилишда «амалий ёрдам сўралиб», хат чиқарилган, деб ёзади телеграмдаги “Daryo — LIVE” канали.
Хат тавсиявий характерда кўрингани билан, унда «қилинган ишлар юзасидан 10 кун муддатда» аъзо бўлганлар ҳақидаги маълумотномаларни асл нусхасини олиб келиш, шунингдек, «50 кишини аъзо қилиш» деганга ўхшаш «план» кўринишида талаб бор.
Энг қизиғи, @xushnudbek’нинг ёзишича, Экологик партияга фермерларни аъзо қилиш ҳақида хат чиқарган А.Эшматовнинг ўзи бошқа бир партия — ЎзЛиДеП сиёсий кенгаши аъзоси. «Бизда сиёсий партиялар фаолияти ўзига хос, бирорта жойда такрорланмайди. Қойил қолиш керак», — дейди ҳуқуқшунос.