Жаҳон банки Қамчиқ довони учун 200 миллион доллар ажратади

Жаҳон банки (ЖБ) «Ўзбекистон темир йўллари» компаниясига 200 миллион доллар миқдорида кредит беради. «Новый век»нинг банк маълумотларига асосланиб (pdf) хабар беришича, ушбу маблағ Қамчиқ довонидан ўтувчи темирйўл қурилишига йўналтирилади.

ЖБ маълумотларига кўра, молия муассасаси Ўзбекистон томони билан кредитнинг лойиҳавий ҳужжатлари бўйича ишга киришган ва бу борадаги ишлар тахминан 2014 йил августида якунига етиши кутилмоқда.

Дастлабки маълумотларга кўра, банк директорлар кенгаши «Ўзбекистон темир йўллари»га 200 миллион доллар миқдорида кредит бериш қарорини 2015 йил январида маъқуллайди.

Жаҳон банкининг ушбу маблағи эвазига зарурий техника ва ускуналар сотиб олинади.

«Ўзбекистон темир йўллари» компанияси 2013 йил июлида Қамчиқ довонидан ўтувчи «Ангрен-Поп» темирйўл линияси қурилишини бошлаган эди. Узунлиги 129 километрга тенг бўлган, умумий қиймати 1,77 миллиард долларлик ушбу лойиҳа беш йил давомида қуриб битказилиши режалаштирилган.