АҚШ президенти Барак Обама тасодифан Кореянинг Samsung смартфони рекламаси қаҳрамонига айланди. Бунга Американинг машҳур бейсболчиси, Boston Red Sox жамоаси аъзоси Девид Ортис сабабчи бўлди. Бу ҳақда Daryo.uz хабар бермоқда
Хабарда айтилишича, спортчи Оқ уйдаги тадбирга таклиф қилинган. Телевизор орқали тўғридан-тўғри эфирга узатилаётган маросим чоғида у Барак Обамадан биргаликда сельфи (ўз-ўзини расмга тушириш) олишни таклиф қилган.
Девид Ортис томонидан Twitter’га жойланган ушбу сельфини ўша заҳотиёқ Samsung ўзининг 5 миллион мухлисларига «ретвит» қилган.
Кейинроқ ушбу «реклама»нинг тасодиф бўлмагани ойдинлашди. Маълум бўлишича, бейсболчи Оқ уйга ташрифидан бир кун аввал Samsung билан битим тузиб, компаниядан Galaxy Note 3 ва у орқали сельфи олиш ҳақидаги кўрсатмаларни қабул қилган.
Оқ уй матбуот котиби айни пайтда ушбу ҳодиса устида суриштирув олиб борилаётганини маълум қилди. «Президент сурати реклама мақсадида ишлатилиши тақиқланади», — деди у.