Абиджан

АБИДЖАН — Кот-д’Ивуардаги  шаҳар (1960—83 йилларда  пойтахт)  ва  асосий  порт.  Абиджан  департаментининг маъмурий маркази.

Гвинея қўлтиғи  соҳилида. Майдони қарийб 2119 км². Аҳолиси  шаҳар  атрофи  билан 4 395 243  киши (2014),  асосан  африкаликлар.  Абиджан—  Африкадаги  замонавий  шаҳарлардан.  Абиджанга 19- асрнинг 80-йилларида  французлар  асос  солган. 1934 йилдан франциянинг Фил Суяги  Қирғоғи  мустамлакасининг  маъмурий  маркази.  Мамлакатнинг  ташқи  савдоси  Абиджан орқали олиб борилади. Абиджан Ғарбий Африканинг  энг  йирик  портларидан  бири,  халқаро  аэропорт  бор.  Озиқ-овқат,  нефтни  қайта  ишлаш (Ғарбий  Африкадаги  энг  катта  нефтни  қайта  ишлаш  заводи),  енгил саноат корхоналари мавжуд. Университет,  Дакардаги Қора Африка институтининг филиали, бир неча театр, кутубхоналар, радиостанция, телемарказ ва бошқалар бор.

Манба:ЎзМЭ