Россия ҳукумати хорижий ишчилар учун квотани 20 фоиз қисқартирди

Россияда хорижий ишчилар учун 2019 йилга мўлжалланган квота тасдиқланди. Кейинги йилда Россияга 2018 йилга нисбатан 20 фоиз кам хорижий ишчилар жалб қилиниши режалаштирилмоқда. Бу ҳақдаги қарорни 8 декабрь куни Россия бош вазири Дмитрий Медведев имзолаган.

Фото:rusplt.ru

Қарорга мувофиқ келгуси йилда Россияда хорижий ишчилар учун 144 583 та ўрин ажратилади. Бу 2018 йилга белгиланган квотанинг 81 фоизига тенг. 2018 йилда 178 450 та ўрин ажратилган эди.
Россия федерал миграция хизмати мамлакатда Ўзбекистон, Тожикистон ва Украина меҳнат муҳожирлари кўпчиликни ташкил этиши ҳақида маълумот берган эди.

Бундан бироз аввал “Известия” газетасига Россия меҳнат ва ижтимоий ҳимоя вазири Максим Топилин Ўзбекистон ва Россия истиқболда нафақа бўйича битим имзолаши мумкинлигини айтган. Унга кўра, Россияда қонуний ишлаётган ўзбекистонлик муҳожирлар муайян нафақа тўловини олиши режалаштирилган.

Манба:Турон24

Гаага суди Қримнинг қўшиб олинишини Украина ва Россия ўртасидаги ҳарбий можаро сифатида талқин қилмоқда

Кремлнинг Қримдаги барча ҳаракатлари Гаагадаги халқаро жиноий суд томонидан инсониятга қарши жиноятлар доирасида ўрганилмоқда. Бу ҳақда Forum Dailyга асосланиб «Дарё.уз» нашри хабар берди

Украина томони олдинроқ судга россияликлар томонидан Қримда содир этилган қатор ҳарбий жиноятлар ҳақида маълумотлар юборганди.

Суд Қрим ҳудудидаги вазиятни Украина ва Россия ўртасидаги халқаро можаро сифатида талқин қилмоқда.

Суд прокурори девонхонаси яқин орада бу иш таҳлилини якунлайди ва уни суд томонидан кўриб чиқилиши эҳтимоли юзасидан хулосани эълон қилади.

 

Ал-Азҳар

АЛ-АЗҲАР (ал-Жоми ал-Азҳарнинг қисқа номи) — Қоҳирадаги жоме масжид, университет, ўрта ва ўрта махсус билим юртларини ўз ичига олган йирик расмий диний муассаса.

Масжид 970—972 йиллари фотимий халифа ал-Муизз амрига биноан Қоҳира шаҳри билан баробар қурилган. Унинг таркибидаги Мадраса (996) 11-асрдан бошлаб Қуръон, ҳадис, фиқҳ, тил ҳамда балоғат фанлари ўқитиладиган университетга айланди. 14—15-асрларда унга яна бир неча янги қурилган мадрасалар кўшидди. 18-асрда Ал-Азҳар энг мўътабар умум-мусулмон фан ва таълим маскани сифатида шуҳрат қозонди.

19-аср бошида Ал-Азҳар уламолари Наполеон Бонапарт истилосига қарши халқ ҳаракатига бошчилик қилдилар. 19-аср охири — 20-аср бошида Ал-Азҳар Абду Муҳаммад бошлиқ ислоҳот тарафдорлари билан консерваторлар ўртасидаги кураш майдонига айланди. 1961 йил «ал-Азҳарни ривожлантириш ҳақида» қонун қабул қилингач, вазирлик мақоми берилган. Ал-Азҳар диний муассасасига раҳбар — Шайхул Азҳарни Миср Президенти тайинлайдиган бўлди. Ушбу конунга кўра Ал-Азҳар университетида қатор дунёвий факультетлар, жумладан, идора ишлари ва савдо, политехника, қишлоқ ҳўжалиги, тиббиёт, педадгогика ва хотин-қизлар факультетлари очилди. Ал-Азҳар ҳузурида 50 йирик уламодан ташкил топган (шулардан 30 нафари мисрлик ва 20 нафари хорижий уламолар) ислом тадқиқотлари Академияси фаолият кўрсатмоқда. Ал-Азҳар кутубхонасида 20 мингдан зиёд қўлёзмалар жамғармаси мавжуд. «Мажаллат ал-Азҳар» журналини нашр этади. Ал-Азҳар университетининг факультетларига шу муассаса таркибига кирувчи бошланғич, ўрта ва ўрта махсус билим юртларини муваффақиятли тугатган толиби илмлар қабул қилинади. Ўрта таълим юрти (маоҳид иъдодия)да ўқиш муддати — 4 йил, махсус таълим (маоҳид сонавия)да эса — 5 йил Ал-Азҳар университетининг турли босқичларида 108,5 мингдан ортиқталаба таҳсил олади. Таниқли уламолар Зиёвуддинхон ва Шамсуддинхон Бобохоновлар, Абдуғани Абдуллаев, Юсуфхон Шокиров, қорақалпоғистонлик диний арбоб Раҳматулла Идрисов, арабшунос олим Шоикромқори Шоисломов ва бошқалар Ал-Азҳарда таҳсил кўрганлар.

Манба:ЎзМЭ

Французлар намойишидан сўнг ҳукумат бензин нарҳини оширмайдиган бўлди

Франциядаги намойишлардан сўнг бензин нархи ошмайдиган бўлди. Бу ҳақда «Хабар.уз» сайти хорижий ОАВларга таяниб хабар бермоқда. «Ёқилғи солиғи ошиши ярим йилга тўхтатилгани эълон қилингач, Елисей саройи нарх ошиши 2019 йилнинг охиригача бекор қилинганини маълум қилди»,- дейилади «BFMTV» телеканали хабарида.

Фото:cdni.rt.com

Аввалроқ Франция бош вазири Эдуар Филипп оммавий намойишларга жавобан ҳукумат бензин ва дизел ёқилғиси нархини 6 ой оширмасликка қарор қилганини маълум қилган эди.

Эслатиб ўтамиз, Францияда бензин нархи ошишига қарши ўтказилган «сариқ нимчалилар» намойиши 17 ноябрда бошланган эди.

Оммавий намойишлар натижасида полиция билан тўқнашувлар, машиналарнинг ёқилиши, дўконлар ва банкларнинг бузилиши каби ҳолатлар содир бўлди. Оқибатда тўрт киши ҳалок бўлди, юзлаб кишилар жароҳатланди.

 

Чақалоқни қурбонлик учун сўйган оила қамоққа олинди

Покистоннинг Панжоб вилоят полицияси қиз чақалоқни қурбонлик учун сўйганликда гумонланаётган 6 кишини, жумладан, чақалоқнинг отасини қўлга олди. Бу ҳақда “Соф.уз” ҳорижий ахборот воситаларига таяниб ёзмоқда.

Иллюстратив фото

3 декабрда тарқатилган хабарда айтилишича, Саргодх шаҳрида ўзини мулла табиб сифатида тақдим қилган шахс бу гуруҳга чақалоқни қурбонлик қилиш шартлигини айтган.

Қизалоқни текширган табиб чақалоқни руҳлар талаб қилаётганини, агар уни сўймасалар арвоҳлар бу оилани таъқиб қилишда давом этишини айтган.

Шундан сўнг чақалоқнинг отаси, бувиси, аммаси ва яна уч киши чақалоқни қурбонлик учун сўйган.

Полициянинг билдиришича, чақалоқни сўйишга кўрсатма берган табиб ҳозир қидирилмоқда. У қочиб кетган. Воқеадан хабар топган чақалоқнинг онаси эри билан ажрашиш учун судга ариза берди.