Вояга етмаганларнинг меҳнат қилиш тартиби қандай?

Меҳнат қонунчилигига кўра, ишга қабул қилишга 16 ёшдан бошлаб йўл қўйилади. 15 ёшга тўлмаган шахслар эса ота-онасининг розилиги билан ишга қабул қилиниши мумкин.

Иллюстратив фото

Таълим муассасасида таҳсил олаётган ўқувчи ёшлар 15 ёшга етганларидан сўнг, ота-онасининг розилиги билан  соғлиғи ва тарбиясига зиён етказмайдиган ҳамда таълим жараёнини бузмайдиган ишларни фақат ўқишдан бўш вақтларида бажариш учун ишга қабул қилинади.

 

Шунингдек, ижтимоий ҳимояга муҳтож шахслар учун банд қилинган иш жойларига иш берувчи маҳаллий меҳнат органлари ва бошқа органлар томонидан юборилган 18 ёшга тўлмаган шахсларни ишга қабул қилиши шарт.

 

Меҳнат қонунчилигида вояга етмаган ходимнинг иш вақти ҳафтасига 24 соатдан ошмаслиги қатъий белгилаб қўйилган.

Манба:Ҳуқуқий ахборот канали

 

Бемаъни ўлим топган адвокат

Америкалик адвокат Клемент Валландигэм 1871 йилда навбатдаги суд жараёнларидан бирида ҳимояда иштирок этади.

Иллюстратив фото

Судда бардаги кичик жанжалнинг ўлим ҳолатига олиб келганлиги бўйича иш кўрилаётган эди.

 

У судда айбланувчини оқлаш мақсадида бардаги ҳолат қурилишини кўрсатиб бермоқчи бўлади. Яъни, жабрланувчи билмаган ҳолатда қўлига тўппончани олиб, ўзини отиб қўйганлигини исботлаш мақсадида чўнтагидаги пистолетни олиб (у пистолет ўқланганини билмаганди) ўзини отиб қўяди.

 

Шу тариқа адвокат маънисиз ўлим топади. Айбланувчи эса оқланади.

Манба:Ҳуқуқий ахборот канали

Улуғбек Қосимов Сурхондарё вилоят прокурори бўлди

Улуғбек Қосимов Сурхондарё вилоят прокурори лавозимига тайинланди. Бу ҳақда Turon24 нашрига Бош прокуратура ахборот хизмати хабар берди.

Улуғбек Қосимов прокуратура органларидаги иш фаолиятини 2005 йилда Денов туман прокуратурасида бошлаган. Сурхондарё вилоят прокуратураси органларида турли лавозимларда, 2011 йилдан Бош прокуратура бошқарма прокурори, Қумқўрғон туман прокурори, Сурхондарё вилояти Музрабод туман ҳокими лавозимларида фаолият юритган.

Айни пайтдаги лавозимига тайинланишидан аввал Сурхондарё вилояти Денов туман ҳокими лавозимида ишлаган.

 

Усмон Туропов Ангор тумани ҳокими бўлди

Сурхондарё вилояти Ангор туманига Усмон Туропов ҳоким этиб тайинланди. Бу ҳақда “Дарё” нашри Сурхондарё вилояти ҳокимлиги ахборот хизмати маълумоти асосида хабар бермоқда.

Халқ депутатлари Ангор тумани Кенгашининг 10 ноябрда бўлиб ўтган навбатдан ташқари сессиясида шу пайтгача ҳоким сифатида ишлаб келган Бахтиёр Ибатов бошқа ишга ўтганлиги сабабли лавозимидан озод этилган. Ибатов айнан қайси лавозимга ўтгани маълум қилинмаган.

 

Туманнинг янги ҳокимига айланган Усмон Туропов бунгача Сурхондарё вилояти экология ва атроф-муҳитни муҳофаза қилиш бошқармаси бошлиғи лавозимида ишлаб келаётган эди.

«Шу кунларда Денов туманига ҳам янги ҳоким тайинланиши кутилмоқда», — дея хабар бермоқда «Turon 24» агентлиги. 8 ноябрь куни Денов тумани ҳокими лавозимида ишлаб келган Улуғбек Қосимов Сурхондарё вилояти прокурори этиб тайинланганди.

 

Биз коррупцияга қаршимиз!

Бугун ҳаво очиқ ва қуёшли бўлди. Гарчи ноябрнинг изғирин куни бўлса-да, бемалол ҳовлидаги ишларни қилиб олиш мумкин эди. Мен ҳам бир ой аввал арраланган, аммо ҳали ўтинбоп қилиб кесилмаган олма, ёнғоқ, бодом шохларини печкабоп қилиб чопиб ўтирар эканман, танлов учун нимадир ёзмоқчи бўлганимни эсладим.

Ҳа, мен коррупцияга қаршиман!

2010 йили пойтахтдан қишлоққа кўчиб келдик. Оилавий шароитимиз уйда ўтиришимга қарши эди. Бир маҳалладошимиздан туман ҳокимлигида хотин-қизлар бўлимида иш борлигини эшитиб қолдим. Эртаси куни туман ҳокими қабулига иш сўраб кирдим. Ҳокимга менинг олий маълумотлилигим, пойтахтда катта газетада ишлаганим ёқди шекилли бўпти ишга оламан, деди. Аммо бир кундан кейин ҳоким бува тўнини тескари кийди. Хотин-қизлар қўмитаси раиси, ҳокимнинг ўринбосари мени ишга олишга рози бўлмабди. Мақсадини айтиб юборибди. Иккита юзталик кўк қоғоз!

Бу ҳақда туман прокуратурасига ариза билан мурожаат қилдим. Худди ўша опанинг ўғли бизнинг маҳалла фуқаролар йиғинида котиб бўлиб ишларкан. Уйимга ўша йигит келиб, мени прокуратура чақираётганлигини айтди.

Опани ушлаймиз, – деди прокуратурадагилар. Аммо мен рози бўлмадим. Чунки энди опа мендан пул олмас, чунки унинг ўғли ҳамма гапдан хабардор эди.

Мен ишсиз қолдим!

Мен коррупцияга қаршиман!

Синглим 15 йил Қўқон педагогика коллежининг бошланғич таълим мутахассислиги дипломи билан боғчада ишлади. Чин дилдан, болаларга жону жаҳонини бериб ишласа ҳам ҳар сафар номутахассис деган тамға ёпиштирилаверди. 2017 йилда ўзи таълим олган коллежда иккинчи мутахассислик очилди. Мактабгача таълим йўналишига ҳужжатларини топшириб, ўқишга кирди. Ва ишидан бўшади. 2018 йилнинг бошида эски мудира пенсияга чиқди. Ўрнига янги мудира келди. Июнь ойида синглим ўз ишига қайтиш учун мудирадан иш сўраб борди. Худди шу пайтда синглим билан ўқийдиган қиз ҳам иш сўраб борди. Синглим қўл учида кун кўради. Касал қайнонаси, қоровул эри ва уч нафар вояга етмаган фарзанди бор. У мудирага 200 доллар бера олмади. Уни ўзи 15 йил ишлаган даргоҳга қайтиб ишга олмади, янги мудира. Аммо 200 доллар берган синглимнинг курсдоши ишлаб юрибди. Ваҳоланки, мудиранинг ўзи коллежда ишлаб юрган, политехника институтини тамомлаган, 2018 йилда махсус таълим йўналишига сиртқи ўқишга кирган, боғчада ярим секунд ҳам ишламаган аёл эди. Ўша пайтда унинг онаси туман халқ таълими бўлими мудири бўлиб ишларди.

Мен коррупцияга қаршиман!

Укам мрамор терувчи уста эди. Ўз ишини ривожлантириш учун МЧЖ очди. Уям осон бўлгани йўқ. У ҳозир Навоийдан Ғозғондан Қўқон шаҳрига 4 машина мрамор олиб келиб, уларни тарошлаб, кесиб турли шаклларга киритиб, тахлаб қўйса, баҳорда тайёр маҳсулотни сотиб, яхшигина даромад олмоқчи. Ўзи 5-6 нафар йигитни иш билан таъминлаган.

Қўлида дастмояси йўқлиги учун имтиёзли кредит ололмаяпти. Банк ходимлари бор отангга, бор онангга қабилида уни ҳалиям сарсон қилишяпти. Банк ходимларидан бири ишини ҳал қилиб бермоқчи, аммо укамнинг ортиқча пули йўқ. Миниб турган “Матиз” машинасини сотмоқчи. Аммо дадам уч марта инфактни бошидан кечирган, ҳар лаҳзада бу касаллик хуруж қилиб қолиши мумкин. Аям ҳам ошқозон ва оёқ, бел оғриғидан азият чекади. Машина қариялар учун керак.

Мен коррупцияга қаршиман!

Турмуш ўртоғим ҳеч қаерда ишламайди. 2017 йилнинг 15 декабрида 3-сектор раҳбари, Ўзбекистон ички ишлар вазири Пўлат Бобожонов фуқаролар учун қабул ўтказади деган эълонни ўқиб, қабул ўтадиган жой – Учкўприк тумани саноат касб-ҳунар коллежига кирдик. Аммо бизни вазирнинг ўринбосари Бобохонов қабул қилди. Унга қишлоқ жойдан Президентнинг 2017 йил 27 мартдаги ипакчиликни ривожлантириш қарори ижросини таъминлаш мақсадида тут плантацияси қилиш учун 2 гектар ер ажратилишини сўраб мурожаат қилдик. Бобохонов бу масала билан шахсан ўзи шуғулланишини айтди. Аммо мана бир йил бўляптики, бирор зоғ келиб ёки турмуш ўртоғимни чақириб мурожаатимиз юзасидан савол-жавоб ўтказгани йўқ. Ҳокимга 500 бермайсизларми, деди ҳоким билан олди-берди қилиб юрганлар. Мен коррупцияга қаршиман! Мактабдан 9 соат дарс қилиб беришди. Мактаб директори фақат оғзи билан ҳамма ишни битирадиган, мактабга жон куйдирмайдиган, таълим-тарбия сифатига эътибор бермайдиган аёл эди. Унинг маънавияти ҳақидаку гапирмасам ҳам бўлади. Бир куни ким Самарқандга борса премия ёзиб бераман, деди. Онам бориб келсинлар, дебманда. Онамни Самарқанду Бухорони айланишга жўнатворибман. Бир йилдан сўнг ҳам менга ваъда қилинган мукофот пули йўқ. Нега менга мукофот ёзмаяпсиз десам, мен ёзганман молия пул ажратмаяпти, -дейди. Бир куни молия бўлимига кириб масалага ойдинлик киритмоқчи бўлдим. Устоз мени бир йил давомида алдаб юрган эканлар. Чунки директор бошқаларга премия ёзиб, ўша пулни ўзлари олишга ўрганиб қолган, мендан эса барибир у пулни менга бермайди, деган ўйда премия ёзмаган эканлар. Мактабда 2015 йилнинг феврал, март ойларида ойлик олмадик. Ҳамма ўқитувчи. Апрелнинг охирида бир гап эшитиб қолдим. Дирекор ўзига ва яна 7 кишига ойликларини туширтирволибди! Дарров халқ таълими бўлими мудирининг ёнига бордим. Ҳақиқат юзага чиқди. Мактабдан ишдан бўшаб кетдим. Бошдан оёғигача коррупцияга ботган директор билан ишлолмасдим. Худди шу аёл халқ таълими бўлими мудири бўлиб турибдию…

Мен коррупцияга қаршиман!

Фақат бу туманда битта ўзим коррупцияга қарши кураша олмаяпман. “Ахир сизни мажбурлаб пахтага олиб чиқяптику, ёзиб беринг”,  дейман ўқитувчига. “Қўйинг, бир жойдаги одаммиз, кейин мени ишлатмайди бу директор” – дейди мунғайиб. “Нега газ балон 70 кундан буён келмаяпти қишлоққа, юринглар Райгазга борамиз” дейман қишлоқдошларимга. “Эй, майли эрта-индин келиб қолар, раҳбарларга ёмон кўриниб нима қиламиз”, – дейди қишлоқдошларим! “Ахир қонуний ҳаққингизку нега сизни ногиронлик нафақасига чиқаришмаяпти” – дейман қўшнимга, эй, пул сўрашяптида, ўғлим қозоқдан келсин, сўраган пулини берайлик, – дейди қўшним. Порталга ёзинг, дейман.

Йўқ,йўқ ва яна йўқ! Чунки ҳамма оч қорним, тинч қулоғим функциясини ёқвоган.

Пули бор одам ишини битириб кетаверади, пули йўқ одам қўлига пул тушгунча ўтираверади.

Мен коррупцияга қаршиман! Йўқ, мен одамларимиздаги лоқайдликка, қўрқоқликка, андишалиликка қаршиман!

 

Шарифа МАДРАҲИМОВА.

Фарғона вилояти

Учкўприк тумани

Қатағон қишлоғи