Бошқа мавзулар
Американинг Кентукки штатида 15 яшар ўсмир Бентон шаҳарчасидаги ўрта мактабдаги синфдошларига қарата ўт очди.
Штат губернатори Мэтт Бевин махсус матбуот анжуманида икки нафар ўсмир отишма қурбонларига айланганлигини маълум қилди. 15 яшар қиз ўша жойнинг ўзида вафот этди, шу ёшдаги ўспирин эса олинган тан жароҳатлари натижасида госпиталда кўз юмди. Ҳаммаси бўлиб 17 киши, шундан 15 нафари ўқдан яраланган.
Полиция ўт очган ўсмирни қўлга олди. Унинг шахси ҳамда нима сабабдан ўт очганлиги ҳақида ҳозирча маълум қилинмаяпти. Ҳуқуқни муҳофаза қилиш органларининг хабар қилишича, унга қотиллик ва суиқасд қилганлик учун айблов қўйилиши мумкин.
Бентондаги отишма 2018 йилда Америка мактабларида юз берган бу каби биринчи ҳодисадир, деб ёзади Associated Press. Барчаси бўлиб, 2013 йилдан бошлаб мактабларда ўқ отадиган қурол ишлатган ҳолда 283 та зўравонлик ҳодисаси қайд қилинган.
