Жалолобод шаҳридан тилла буюмларини ўғирлаганликда гумондор қаторида ушланган ўзбекистонлик беш аёл тергов якунлангунича қамоқда қолади. Бу ҳақда ҳудудий милиция бошқармаси маълум қилди.
30-56 ёшлардаги аёллар 16-февралда Қирғизистон билан Ўзбекистон чегараси оралиғидагидаги «Маданият» божхона бекатидан ўтаётган жойида ушланган. Улар «Жалолобод шаҳридаги марказий савдо марказидан олтин ўғирлаган» деб гумонланиб, қидирувга берилгани аниқланган.
Ўзбекистонлик аёлларнинг ёнидан дўкондан ўғирлангани айтилган тилла буюмлари топилган. Маълумотларга қараганда, буюмларнинг нарҳи 350 минг сомга баҳоланмоқда.
Тергов пайтида аёлларнинг бири айбига иқрор бўлиб, ўғирликни унинг ўзи қилганини ва шерикларининг алоқаси йўқлигини айтган. Суриштирув ишлари давом этмоқда.