Бошқа мавзуларУч-тўрт кун олдин – туғилган куним билан табриклаб чиққан мухлисларим ҳаётга чанқоқлигим ва ўзимга бўлган ишончимни янада орттиришди десам, ишонаверинг. Шу куни телефоним ҳам табриклардан тинмади. Бир муҳлисим айтади:
– Қадамбой ака, биз сизни жуда яхши кўрамиз, аммо…
– Хўш-хўш?
– Сизнинг танқидий мақолаларингизни қолдирмай ўқиб бораман. Сиз теша тегмаган нарсаларни ёзасизки ва наштарингиз шу қадар учлики, афсуски, минг роҳатланиб ўқисам ҳам – “лайк” босишга чўчийман.
– Нимадан чўчийсиз? – дедим ҳайрон бўлиб. – Ё бировга тухмат қилдимми?
– Сиздан илтимос, – деди мухлисим. – Ҳар вақтдан лирик чекиниш ҳам қилиб туринг, давлат сиёсатининг яхши томонлари ҳақидаям ёзинг – токи, биз – мухлислар ҳам “мазза қилиб“ ЛАЙК босайлик?
– Биринчидан, давлат билан, унинг сиёсати билан ишим йўқ. Мен коррупция ёки бюрократия устидан куламан. Бу иллатлар халқ ва хукумат орасидаги чуқур жарликка ўхшайди. Умуман, айтинг-чи яқин орада оддий халқ учун қандай ижобий ўзгариш бўлдики – мен кўрмай қолган бўлсам?
– Биргина мисол: бундан уч йил олдин сиз хозиргидек бемалол чиқиш қила олармидингиз – йўқ! Мирзиёев демократияга кенг йўл очди. Хозирги айтаётган гапларингизни ИАК замонидаям айтиб кўринг эди!?
– Э-э ука, аслида демократия ўша замонда кучлимиди дейман? Чунки ҳар ким айтган гапи, ишлаган ишига жавоб бериши шарт эди. Хозир эса – ҳамма гапиряпти, аммо хеч ким эшитмаяпти. Бу демократия эмас, бу ҳақиқий БЮРОКРАТИЯ!
18.05.2019
Қадамбой Отабоев
