Бошқа мавзулар
Агарда ҳужжатлардаги асосий шрифт алмаштирилса, давлат бундан бир неча миллион доллар ютиши мумкин. Буни пенсильваниялик ўсмир шрифтлар устида ўтказган тадқиқоти билан исботлаб берди, деб ёзади Daryo.Uz нашри.
Хабарга кўра, 14 ёшли Сувир Мирчандани дарсда тарқатма материаллар жуда кўплигини пайқаб қолиб, уларнинг таннархини сўраган. Аниқланишича, ёш тадқиқотчи яшаётган Питтсбургда бир унсия (29,5 миллилитр) сиёҳ нархи 75 долларгача борар экан. Бу эса худди шунча ҳажмли Chanel №5 атирига нисбатан икки баравар қиммат, деганидир.
Кейин эса ўқувчи APFill Ink Coverage дастуридан фойдаланиб, матнларни Century Gothic, Comic Sans, Garamond ва Times New Roman шрифтларида терганда қанча миқдорда сиёҳ сарфланишини ҳисоблаб чиқди. Тадқиқот натижасига кўра, Garamond шрифти бошқаларига нисбатан тежамкорроқ экан.
Сувирнинг ҳисоб-китобларига қараганда, одатда матнлар териладиган Times News Roman шрифтини Garamond’га алмаштириш билан унинг мактаб округида йилига 21 минг долларлик сиёҳни тежаш мумкин экан. Агар бу федерал ҳукумат ва АҚШ ҳукумат идораларига ҳам жорий этилса, тежамкорлик йилига 370 миллион долларгача ошади.
АҚШ давлат босмахонаси вакили Гери Сомерсет ўсмирнинг бу ишини юксак баҳолади, аммо Сувир Мирчанданининг тадқиқоти натижаси амалиётда қўлланилиши борасидаги саволга аниқ жавоб бергани йўқ.
