Оқ уйнинг миллий хавфсизлик масалалари бўйича маслаҳатчиси Герберт Макмастернинг фикрича, ғарб мамлакатлари Россиянинг “беқарорлаштирувчи ҳатти-ҳаракатларига” қарши туришлари керак. Унинг сўзларига кўра, Москва эркин ва очиқ жамиятни заифлаштириш мақсадида “жуда мураккаб бўлган кампания”ни олиб бормоқда.
19 декабрь куни эълон қилинган Би-би-сига берган интервьюсида Макмастер ўтган йилги АҚШда бўлиб ўтган президентлик сайловларига Россиянинг эҳтимолий аралашуви “сўзсиз” миллий хавфсизликка таҳдид бўлган, дея баёнот берди.
Герберт Макмастернинг фикрича, 2016 йилги сайлов кампаниясига Россиянинг аралашувидан мақсад АҚШ сиёсий ландшафтнинг ҳар икки томони бўлган. Унинг айтишича, Россия кескинликни ташкил қилиш мақсадида ҳам сўл, ҳам ўнг кучларни қўллаб-қувватлайди.
Куни кеча эълон қилинган АҚШ миллий хавфсизлик янги стратегиясида Россия ва Хитой АҚШ билан рақобатда бўлган кучлар сифатида талқин қилиниб, “Америка ҳукуматига, унинг манфаатлари ва таъсирига Америка хавфсизлиги ва фаровонлигини заифлаштириш орқали таҳдид солиши”дан огоҳлантирилади.