Бошқа мавзулар
Нукус аэропортининг янги терминали очилиш маросимида сўзга чиққан Ўзбекистон бош вазирининг биринчи ўринбосари Очилбой Раматов аэропортлардаги хизмат кўрсатиш соҳасидан қониқмаслигини билдирди, деб хабар берди Kun.uz мухбири.
“Бундай чиройли терминаллар халқимиз, келаётган меҳмонлар учун жуда зарур, лекин улардан тўлиқ фойдаланиш даркор. Терминал соатига 400 йўловчига хизмат қилса-ю, кунига 200 йўловчи фойдаланадиган бўлса, терминал атиги 5 фоизга ишлайди. Қолган 95 фоизи эса тўхтаб туради. Терминал кунига ҳеч бўлмаганда 5-10 минг кишига хизмат қилиши керак, шундагина аэропорт ишчи-ходимларининг ойликлари ошади. Аэропортнинг фақатгина 5 фоизи ишлаб туришидан ҳеч қандай фойда кўрилмайди ”, – деди Раматов.
Раматовнинг айтишича, ҳозирда авиация хизмати халқ талабини қондириб беролмаяпти.
“Аэропортда самолётлар тўхтовсиз учиб туриши лозим. Кун бўйи битта самолёт учиши ҳеч қачон ўзини оқламайди. Ҳозирда ўзини қоплаш учун фақат чипта сотишдан даромад топилмоқда”, дея қайд этди бош вазирнинг биринчи ўринбосари.
Эслатиб ўтамиз, Нукус аэропорти 2017 йил 1 майда реконструкция учун ёпилганди. Эндиликда аэропортнинг йўловчи ўтказиш қуввати икки мартага ошди.
Манба: kun.uz
