Кеча Бухородаги Пойи Калон мажмуасида Ўзбекистон миллий симфоник оркестрининг “Open AIR” Silk road simfony” концерти бўлиб ўтди.
“Буюк ипак йўли шаҳарлари бўйлаб мусиқали саёҳат” лойиҳаси доирасидаги ушбу концертда 125 нафар мусиқачи ва ижрочилар жамоаси ўз санъатини намоён этди.
Ўзбек санъатининг олтин фонди мужассам концерт давомида жаҳон классик мусиқа асарлари, ўзбек композиторлари яратган мумтоз санъат дурдоналари, ариялар ва миллий куйлар жонли ижро этилди.
Қадимий шаҳарда, тарихий ёдгорликлар олдида концерт бериш катта бахт. Мен ўйлайманки, бу концертимиз бухороликлар томонидан катта қизиқиш билан қаршиланди. Бизнинг асосий мақсадимиз жонли ижрони халққа тақдим этиш,-деди концертни томошабинлар билан уйғун тарзда олиб борган маҳоратли дирижёр, халқаро танловлар лауреати Алибек Кабдураҳмонов.
Очиқ осмон остидаги мусиқий лаҳзалардан беш мингга яқин бухоролик санъат ихлосмандлари ҳамда хорижлик сайёҳлар баҳраманд бўлди.
Эслатиб ўтамиз, “Open AIR” Silk road simfony” концерти Ўзбекистоннинг Буюк ипак йўли бўйлаб жойлашган бешта шаҳри Гулистон, Жиззах, Самарқанд, Навоий ҳамда Бухорода бўлиб ўтди.