Польша Украинага енгил миномётлар етказиб беришга тайёр. Бу ҳақда бош вазир Матеуш Моравецки Украина бош вазири Денис Шмигал билан учрашувда айтиб ўтди.
Икки томонлама учрашув кеча, 1-февраль куни Киевда бўлиб ўтди.
“Биз Украинага ўн минглаб артиллерия қуроллари, ҳаво ҳужумидан мудофаа қилиш тизимлари, енгил миномётлар, шунингдек разведкачи учувчисиз самолётлар ва бошқа мудофаа воситалари билан таъминлашга тайёрмиз”, — деди Моравецкий.
Аввалроқ Польша Украинага дронлар ва ўқ-дорилар етказиб беришини маълум қилган.
Россия ҳеч кимни қўрқитмаслигини ва ҳужум қилмаслигини айтиб келади. “Россия тажовузи” ҳақидаги баёнотлар НАТОнинг ҳарбий техникасини Россия чегараларида кўпроқ жойлаштириш учун баҳонадир дея Москва айблаб келмоқда.
Шунингдек Киев ва Ғарб давлатлари Россиянинг Украина чегараси яқинида кучайиб бораётган “тажовузкор ҳаракати”дан хавотир билдириб келади.