Бошқа мавзуларРоссия қуролли кучлари сафида Украинадаги жангларда қатнашиб, ҳалок бўлган тўрт нафар Тожикистон фуқаросининг жасади ватанига қайтарилди.
50 ёшли Саидакбар Саидов ўзи туғилиб ўсган Хатлон вилояти Ҳамадоний тумани Тўдабоён қишлоғида дафн этилди. У Украинанинг қайси ҳудудида вафот этгани номаълум. Қариндошлари журналистларга батафсил маълумот беришдан ўзларини тийишмоқда.
Қишлоқ раҳбари, марҳумнинг оғаси Ёрмуҳаммад Саидов укаси кўп йиллар аввал Россия фуқаролигини олгани ва яқинда мамлакат қуролли кучларида хизмат қилганини айтди.
Украинадаги уруш қурбонларидан бири, 38 ёшли Рамазон Муртазоев ҳам шу туман яшовчиси бўлиб чиқди. Унинг яқинлари ҳам изоҳ беришдан бош тортдилар.
Қолган икки Тожикистон фуқаросининг қаерда яшаши номаълум. Баъзи маълумотларга кўра, тожикистонлик қурбонлар сони 10 кишигача етиши мумкин.
