Бошқа мавзулар
2019 йилнинг баҳорида чегарадаги Панж дарёсига саккизинчи кўприк қурила бошланади. Бу кўприк Тожикистоннинг Фархор туманини Афғонистонинг Таҳор вилоятидаги Ойхоним тумани билан боғлайди. Фархор туман маъмуриятидаги манбанинг айтишича, узунлиги 180 метр бўлган кўприк тўрт йилда қуриб битказилади.
“Мазкур кўприкнинг қурилиши учун Евроиттифоқ 18 миллион доллар миқдорида грант ажратди. Кўприк қурилиши билан бир вақтда туман марказини кўприк қуриладиган Кокуль қишлоғи билан боғлайдиган 18 километрлик автомобил йўлини таъмирлаш ҳам кўзда тутилган”, – дейди манба.
Қўшни Афғонистон ва Тожикистон ўртасидаги кўприкнинг қурилиши икки томонлама ҳамкорлик доирасида амалга оширилмоқда. Объект маҳаллий хусусий сектор ва бозорнинг ривожланишига, минтақада тинчлик, барқарорлик ва хавфсизлик қарор топишига ҳисса қўшади.
Кўприк қурилиб фойдаланишга топширилганидан кейин Тожикистон ва Афғонистонни саккизта кўприк боғлаб туради. Бу кўприкларнинг энг каттаси АҚШ хукумати маблағлари эвазига қурилган Қуйи Панждаги кўприкдир.
Дарёнинг ҳар икки томонида кўприклар яқинида чегараолди бозорлари фаолият юритади. Бу бозорлар Афғонистон ва Тожикистон ўртасидаги савдо алоқаларининг ривожига ҳисса қўшмоқда. Энг гавжум бозор Тоғли Бадахшонда экани айтилади.
