Бошқа мавзулар«Ўзбекистон ҳаво йўллари»нинг Тошкент-Амритсар йўналиши бўйича ҳаракатланаётган Boeing 767 русумли самолёти Тошкентга қайтарилди. Бу маълумотни Тошкент аэропортидаги манбага асосланиб Kun.uz нашри ёзмоқда.
Манбанинг аниқлик киритишича, самолётнинг ортга қайтарилишига Покистон ва Ҳиндистон ўртасида юзага келган можаро ортидан покистонликлар ҳудуддаги ҳаво кенглигини ёпиши сабаб бўлган.
Амритсар – Ҳиндистоннинг Покистон билан чегараларига яқин шаҳри ҳисобланади.
Бироз аввалроқ Покистон армияси ҳиндистонликларнинг икки самолётини Кашмирдаги ҳаво ҳудудига кириб келгани учун уриб туширганини маълум қилганди. Бунга жавобан Ҳиндистон томони ҳам покистонликларнинг битта қирувчи самолётини уриб туширган.
26 февраль куни Ҳиндистон ҳарбий-ҳаво кучлари 14 февраль кунги терактга жавобан Кашмирнинг Покистон қисмидаги «Жайш-а-Муҳаммад» гуруҳининг йирик машғулот лагерига зарбалар берди. Ҳаво ҳужуми оқибатида кўплаб жангарилар, уларга тегишли транспорт, қурол ва ўқ-дори йўқ қилинганди. Ҳиндистон ташқи ишлар вазири биринчи ўринбосари Вижай Гокхале бу зарба зарур бўлгани, чунки гуруҳ Ҳиндистоннинг турли ҳудудларига худкушлар иштирокида ҳужумлар тайёрлаётганини айтган.
