2019 йилнинг 29-30 май кунлари Россия Федерацияси ҳукумати раҳбари Дмитрий Медведев бошчилигидаги делегация Ўзбекистонга ташриф буюради.
ТИВ хабарига кўра, Ўзбекистон Республикаси президенти Шавкат Мирзиёев Россия делегациясини қабул қилади.
Ташриф доирасида Урганч шаҳрида ҳукумат раҳбарлари даражасидаги Ўзбекистон-Россия Қўшма комиссиясининг биринчи йиғилишини ўтказиш режалаштирилган. Мазкур тадбир икки томонлама ҳамкорликнинг янги шакли бўлиб, унга 2018 йил октябр ойида Россия президенти Владимир Путиннинг давлат ташрифи ва олий даражадаги музокаралар давомида асос солинган.
Икки мамлакат ҳукуматлари раҳбарлари томонидан Иқтисодий ҳамкорлик бўйича ҳукуматлараро комиссиясининг 24 апрелда бўлиб ўтган йигирманчи йиғилиши якунлари сарҳисоб қилинади ва савдо-иқтисодий ҳамкорликни янада ривожлантиришнинг истиқболли йўналишлари ва уларнинг таркибини амалий жиҳатдан бойитиш масалалари муҳокама қилинади.
Россия делегация раҳбари Хива шаҳрига ҳам ташриф буюради, дейилади хабарда.