Бошқа мавзуларНидерландиянинг Россиядаги консуллиги 27-апрелдан бошлаб қисқа муддатли виза, жумладан, туристик виза беришни тўхтатишини маълум қилди.
Ушбу қарор дипломатик ходимлар сонининг қисқариши туфайли қабул қилинган.
19-апрелда Россия Ташқи ишлар вазирлиги 15 нафар голланд дипломатини чиқариб юборгани ҳақида эълон қилди. Бу 2022-йилнинг март ойи охирида Нидерландия Россия дипломатик миссиясининг 17 нафар аъзосини персона нон грата деб эълон қилганига жавоб бўлди.
Нидерландия консуллиги маълумотларига кўра, энди россияликлар ўз мамлакати ҳудудидагина гуманитар визалар ва вақтинчалик яшаш учун рухсатномалар олишлари мумкин.
Россияда Шенген туристик визасини Италия, Франция ёки Венгриянинг консуллигидан олиши мумкин.
Эстония, Латвия, Литва ва Чехия Украинада уруш бошланганидан бери қисқа муддатли виза беришни тақиқлаган. 2022-йилнинг 24-февралидан буён Европадан жами 400 дан ортиқ дипломат чиқариб юборилди.
Россия президенти Владимир Путиннинг Донбассдаги сепаратистик тузилмаларни ҳимоя қилиш ҳақидаги баёноти ортидан 24-февралда Россия қўшинлари Украинага бостириб кирди. Икки ойдан буён давом этаётган отишмалардан ҳар икки томондан минглаб одамлар ҳалок бўлди. 5 миллионга яқин одам Украинани тарк этди.
Уруш бошланганидан буён дунёнинг бир қатор давлатлари Россияга қарши санкциялар киритиб, унинг айрим фуқароларига бу давлатларга киришни тақиқлади.
