Туркманистонда президент Сердар Бердимуҳамедовнинг онаси «Хизмат кўрсатган гиламчи» фахрий унвони билан тақдирланди.
“Нейтрал Туркманистон” давлат газетасининг ёзишича, бу унвон мамлакатнинг мустақиллигини мустаҳкамлаш ва миллий гиламдўзлик санъатига қўшилган кўп йиллик виждонан меҳнати учун «Туркмангилам»нинг илтимосига кўра берилган.
Ушбу унвонга Ўғулгерек Бердимуҳамедова билан биргаликда яна 11 нафар аёл сазовор бўлди. Туркманистонда гилам байрами 1991-йилдан бери май ойининг охирги якшанбасида нишонланади.
Туркманистоннинг собиқ биринчи хоними, амалдаги президентнинг онаси неча ёшда ва у нима билан шуғулланиши номаълум. Биринчи хоним сифатида Гурбангули Бердимуҳамедов билан бирга чегарага бормаган. Унинг сурати туркман матбуотида илк бор ўтган йили пайдо бўлган.