Бошқа мавзуларҚасим-Жўмарт Тўқаевнинг матбуот хизмати Қозоғистон президенти Россиянинг Александр Невский номидаги орденидан воз кечганини маълум қилди.
Матбуот котиби Руслан Желдибайнинг «Власть» журналига айтишича, Тўқаев муддати тугагунига қадар ҳам маҳаллий, ҳам хорижий мукофотларни қабул қилмасликка қарор қилган.
Невский ордени Тўқаевга Санкт-Петербургдаги иқтисодий форумда топширилиши керак бўлган. 17-июнь кунги йиғилишда қатнашган Тўқаев россияпараст айирмачилар мустақил деб эълон қилган «ДХР» ва «ЛХР»ни тан олмаслигини айтган.
Александр Невский номидаги орден Россия билан узоқ йиллар ҳамкорлик қилган, иқтисодий ва ижтимоий алоқаларни мустаҳкамлаган хорижий сиёсатчиларга берилади.
Бироқ Кремлнинг матбуот котиби Дмитрий Песков 18-июнда «Подъём» нашрига Россияда Тўқаевни тақдирлаш режаси бўлмаганини маълум қилди.
Қозоғистон президенти матбуот хизмати Тўқаев аввал Бишкекка бўлган ташрифи чоғида биринчи даражали «Манас» орденини олишдан бош тортганини таъкидлаган.
2017-йилда Россия президенти Владимир Путин Қозоғистон сенатининг ўша пайтдаги спикери Қасим-Жўмарт Тўқаевни Россия ва Қозоғистон халқлари ўртасидаги «дўстлик ва ҳамкорликни мустаҳкамлагани» учун махсус орден билан тақдирлаган эди.
