Афғонистондаги Толибон ҳукумати TikTok ижтимоий тармоғи ва PUBG онлайн ўйинини тақиқлади.
Бу ҳақда ҳукумат матбуот котиби Иномуллоҳ Самангоний Твиттер саҳифасида ёзди. Унинг қайд этишича, ҳукумат Алоқа ва ахборотлаштириш вазирлигига ёш авлодни нотўғри йўлга олиб кираётган ижтимоий дастур ва онлайн ўйинларни ёпиш бўйича топшириқ берган.
Хитой компаниясига тегишли «TikTok» ҳозир кунда ёшлар орасида машҳур дастур ҳисобланади. Уни бутун дунё бўйлаб 1 миллиарддан ортиқ киши қўлланади.
Аввалроқ, баъзи экспертлар бу болалар ва ёшларнинг психологик саломатлигига таъсир қилишини таъкидлаган.
Шунингдек PUBG ўйини Жанубий Кореянинг «Крафтон» компаниясига тегишли.
Таҳлилчилар бу ўйинлар тақиқлангани билан ушбу иловаларни Афғонистонда ёпиш қийин бўлишини айтишади. Сабаби истаган шахс ўйинларга VPN каби платформалар ёрдамида кириши мумкин.