Қорақалпоғистондаги тартибсизликлар вақтида ташқи кучлар таъсири остида қўлига қурол олган айирмачилар орган ходимларига ўқ узган. Бу ҳақда Шавкат Мирзиёев Нукуснинг Жекетерак маҳалласи аҳолиси билан учрашувда маълум қилди. Суҳбат аудиоси Kun.uz томонидан эълон қилинди.
«Албатта кўп давлатлар нотинч. Кўп давлатлардан бундай ўрнак олиш бизга ярашмайди. Бизга фақат тинчлик ва осойишталик, бирдамлигимиз керак», — деди у.
Эслатиб ўтамиз, 26 июнь куни жамоатчилик муҳокамасига қўйилган янги таҳрирдаги Конституциянинг Қорақалпоғистонга оид моддалари Ўзбекистон таркибидаги республика аҳолиси ўртасида норозилик уйғотган эди.
Ижтимоий тармоқларда қизғин муҳокамалардан сўнг 1-июлда Нукусда оммавий намойишлар бошланди. Айрим интернет фойдаланувчилари Қорақалпоғистон ҳудудига Қуролли Кучлар ҳарбий техникаси кириб келаётгани ҳақида видеоларни жойлаштирди.