Бошқа мавзулар26 ноябрь куни соат 8:05 ларда “Шаҳрисабз—Қарши” автомобиль йўлида йўл-транспорт ҳодисаси рўй берди. Бу ҳақда телеграммдаги Daryo — LIVE канали Ўзбекистон Мудофаа вазирлиги матбуот хизматига асосланиб хабар бермоқда.
Мудофаа вазирлиги қўшинларининг жанговар тайёргарлигини фавқулодда комплекс текширувдан ўтказиш режасига мувофиқ, ҳарбий автомобиллар колоннаси ўқув-машғулотлар ўтказиш ҳудуди томон йўл олаётган эди. Юқорида қайд этилган йўл чорраҳасидаги ҳаракат ҳарбий автомобиль инспекцияси ходимлари томонидан тартибга солинаётган эди.
Инспекторлар ҳаракатни тақиқлашга ишора қилганига қарамай, давлат рақами 70 U 110 MA бўлган Lacetti автомобили ҳаракатланишда давом этди. Натижада у ЗИЛ-131 русумли ҳарбий юк машинаси билан тўқнашиб кетди. Уч киши — енгил автомобиль ҳайдовчиси ва икки йўловчи ҳалок бўлди, Lacetti’нинг яна бир йўловчиси жароҳат олди.
Жабрланган фуқарога ўз вақтида тиббий хизмат кўрсатилди, ҳозирда унинг ҳолати барқарор ва ҳаётига ҳеч нарса хавф солмаяпти.
